Wazzup Pilipinas!?
Pangunahing hangarin ng isang magulang para sa kaniyang anak ang mabigyan ng masustansyang pagkain sa araw-araw, subalit, dahil sa kakulangang pang-pinansyal, maaaring maging mahirap para sa isang pamilya na magkaroon ng balanse sa pagitan ng abot-kaya at wastong nutritisyon na kinakailangan ng isang bata.
Lumabas sa mga pag-aaral na isa sa mga pangunahing sanhi ng malnutrisyon ay ang hindi sapat na pagkain ng masustansya na kinakailangan ng ating katawan. Upang maging malusog, dapat na maibigay ang hustong nutrients katulad ng carbohydrates, taba, protina at bitamina.
Kaugnay nito, at upang matulungan ang iyong pamilya na makaiwas sa malnutrisyon, narito ang mga tips sa paghahanda ng masustansyang pagkain na swak sa iyong badyet na tiyak na magugustuhan rin ng iyong anak:
Isang mahalagang bahagi ng balanseng pagkain ay ang taba at protina. Bumili ng abot-kayang pagkain tulad ng itlog, munggo at mga sariwang isda. Ang mga opsyon na ito ay hindi lamang matipid sa bulsa, kundi dahil ito rin ay masustansya na nakatutulong sa paglaki ng iyong anak.
Ang pagpaplano ng maaga ay isa sa mga susi sa abot-kaya at masustansyang pagluluto. Maglaan ng ilang oras kada linggo upang magplano. Sa maagang pagpaplano maaari kang gumawa ng listahan upang maiwasan ang pagbili ng hindi naman kailangan. Huwag kalimutan na isama ang mga pagkain tulad ng kanin, gulay, manok, baboy o tokwa na naglalaman ng nutrients na kinakailangan ng iyong anak.
Mahalaga ang mga sariwang prutas at gulay upang maging malusog. Hindi lamang abot-kaya, masustansya at sariwa ang mga lokal na produkto, matutulungan din ang ating magsasaka sa kanilang kabuhayan. Isama ang mga prutas, gulay na karaniwang makikita sa Pilipinas, tulad ng saging, papaya, talong, okra, malunggay at kamote. Ang mga pagkain na ito ay masustansya at kadalasang makukuha sa abot-kayang presyo sa merkado.
Maaaring lutuing muli ang mga natirang pagkain upang makalikha ng ibang ulam. Halimbawa, gamitin ang natirang inihaw na manok para gawing adobong manok o gawing sinangag ang sobrang kanin. Maaari naman isama sa may sabaw na ulam ang natirang karne at gulay. Ngunit dapat na siguruhin ito ay maaari pang makain. Sa pamamagitan ng muling paggamit ng mga natirang pagkain, ikaw ay makatitipid at makababawas din sa pagkasayang ng pagkain o food waste.
Tandaan na hindi mahal ang maging healthy. Tulad ng tema ng Buwan ng Nutrisyon ngayong Hulyo, “Healthy Diet Gawing Affordable For All!” sa pamamagitan ng paggamit ng lokal na sangkap at tamang diskarte sa pagluluto, masisigurado mong makukuha ng iyong anak ang mga nutrients na kinakailangan para sa mas malusog na katawan.
Ross is known as the Pambansang Blogger ng Pilipinas - An Information and Communication Technology (ICT) Professional by profession and a Social Media Evangelist by heart.
Post a Comment